വിവരാകാശ നിയമം വിപ്ലവകരമായ ചുവടുവെപ്പ് : ജസ്റ്റിസ് പി.ജി അജിത് കുമാർ

വിവരാവകാശ നിയമം വിപ്ലവകരമായ ചുവടുവെപ്പ് : ജസ്റ്റിസ് പി ജി അജിത് കുമാർ* 

 വിവരാവകാശ നിയമം ഇന്ത്യൻ ജനാധിപത്യത്തിൽ ഒരു വിപ്ലവകരമായ ചൂടുവെപ്പ് ആയിരുന്നുവെന്ന് ജസ്റ്റിസ് പി. ജി അജിത്കുമാർ പറഞ്ഞു. ചാവറ കൾച്ചറൽ സെന്ററിൽ വിവരാവകാശ കമ്മീഷണർ ഡോ. അബ്ദുൽ ഹക്കീമിന് യാത്രയയപ്പും വിവരാവകാശ സെമിനാറും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം . 

 നിയമത്തിൽ പറഞ്ഞതുകൊണ്ട് മാത്രം ഒരു അവകാശവും ലഭിക്കില്ല. അത് ജനങ്ങൾക്ക് ലഭ്യമാക്കുന്നുണ്ടെന്ന് ഉറപ്പുവരുത്തുകയാണ് വേണ്ടത്. വിവരം ലഭ്യമാക്കുക എന്നത് ഒരു മൗലികാവകാശമാണ്. ഏത് പൊതു ഓഫീസിൽ നിന്നും ഏതു പൊതു രേഖയും ലഭ്യമാക്കണമെന്നത് മൗലീകാവകാശമാണ്.  സാധാരണ ജനങ്ങളുടെ ആവശ്യങ്ങളും ആഗ്രഹങ്ങളും പ്രതിഫലിപ്പിക്കുന്നതായിരിക്കണം ജനപ്രതികളും നിയമസഭകളും എന്ന് അദ്ദേഹം പറഞ്ഞു. 

വിരമിക്കുന്ന സംസ്ഥാന വിവരാവകാശ കമ്മീഷണർ ഡോ. അബ്ദുൽ ഹക്കീം സെമിനാർ നയിച്ചു. അധികാരികളെ ചോദ്യം ചെയ്യാൻ ജനങ്ങളുടെ വിരലിന് ശക്തി നൽകിയ നിയമമാണ് വിവരാവകാശ നിയമമെന്ന് അദ്ദേഹം പറഞ്ഞു. ജനാധിപത്യത്തെ ജനപ്രാതിനിധ്യ ഭരണ സംവിധാനത്തിൽ നിന്ന് ജനപങ്കാളിത്തത്തിൻ്റെ പ്രായോഗിക തലത്തിലേക്ക് കൈ പിടിച്ചാനയിച്ച മഹത്തായ വിപ്ലവമാണ് വിവരാവകാശ നിയമം. 

പത്തുരൂപ നൽകി ഏതൊരു പൗരനും വിവരങ്ങൾ അറിയുവാനുള്ള സ്വാതന്ത്ര്യമാണ് വിവരാവകാശ നിയമത്തിന്റെ അന്തസത്ത എന്ന് അബ്ദുൽ ഹക്കീം പറഞ്ഞു. മനുഷ്യ ജീവിതത്തിന്റെ സമസ്ത മേഖലകളിലും ബാധിക്കുന്ന നിയമമായ വിവരാവകാശ നിയമം ജനാധിപത്യത്തിന്റെ അഞ്ചാംതൂണായി വളർന്നുനിൽക്കുന്ന,  നെടുംതൂണാണ് എന്നും അദ്ദേഹം പറഞ്ഞു. ജനപ്രതിനിധികൾ സ്ഥാനത്ത് നിന്നും വിട്ടുപോകുമ്പോൾ ആസ്തി വിവരങ്ങൾ പുറത്തുവിടണമെന്നും വിവരാവകാശ നിയമത്തിന്റെ ചിറകരിയുന്ന,  ദുർബലപ്പെടുത്തുന്ന നീക്കങ്ങളെ ചെറുക്കണമെന്നും അദ്ദേഹം ആവശ്യപ്പെട്ടു.

ചാവറ കൾച്ചറൽ സെന്റർ,  പ്രവാസി ലീഗൽ സെൽ, ആർ ടി ഐ കേരള ഫെഡറേഷൻ, പരിവർത്തൻ കേരള എന്നീ സംഘടനകളുടെ ആഭിമുഖ്യത്തിൽ സംഘടിപ്പിച്ച പരിപാടിയിൽ വിരമിക്കുന്ന സംസ്ഥാന വിവരാവകാശ കമ്മീഷണർ ഡോ. അബ്ദുൾ ഹക്കീമിന്  ഉപഹാരം നൽകി ആദരിച്ചു. 

ചടങ്ങിൽ മനുഷ്യാവകാശ കമ്മീഷൻ മുൻ ആക്ടിങ് ചെയർപേഴ്സൺ പി. മോഹനദാസ് അധ്യക്ഷനായി. ചാവറ കൾച്ചറൽ സെൻ്റർ ഡയറക്ടർ ഫാ. അനിൽ ഫിലിപ്പ്, ജില്ലാ ഉപഭോക്‌തൃ തർക്ക പരിഹാര കമ്മീഷൻ പ്രസിഡൻ്റ് ഡി. ബി ബിനു, ആർ.ടി.ഐ കേരള ഫെഡറേഷൻ രക്ഷാധികാരി കെ.എൻ. കെ നമ്പൂതിരി, പരിവർത്തൻ കേരള സംസ്ഥാന കോർഡിനേറ്റർ ഐപ്പ് ജോസഫ് എന്നിവർ പങ്കെടുത്തു. സെമിനാറിൽ വിവിധ കോളേജുകളിലെ അധ്യാപകരും വിദ്യാർത്ഥികളും പങ്കെടുത്തു